حملے اور کیمیائی مواد کا چھڑکاؤ، لبنان کی اقوام متحدہ سے شکایت

بیروت :لبنان نے اپنی سرزمین پر اسرائیلی حملوں اور سرحدی علاقوں میں کیمیائی مادے کے چھڑکاؤ کیخلاف اقوام متحدہ کے سربراہ اور سلامتی کونسل کو شکایات جمع کرا دی ہیں۔ لبنانی وزارت خارجہ نے سلامتی کونسل اور اقوام متحدہ کے سربراہ کو بھیجی گئی پہلی شکایت میں الزام عائد کیا ہے کہ اسرائیلی فوج نے رواں سال فروری میں جنوبی لبنان کے سرحدی دیہات میں ہریالی ختم کرنے والا کیمیائی مادہ گلائفوسیٹ اسپرے کیا۔ دیہات سے حاصل کیے گئے مٹی کے نمونوں میں کیمیائی مادے کی غیرمعمولی حد تک بلند مقدار پائی گئی۔ کیمیائی ہتھیاروں سے متعلق بین الاقوامی کنونشن جنگی مقاصد کے لیے ایسے کیمیائی مادوں کے استعمال کی اجازت نہیں دیتا۔ دوسری شکایت میں اسرائیلی حملوں کے تسلسل پر اعتراض اٹھایا گیا ہے۔ لبنان نے اقوام متحدہ سے مطالبہ کیا ہے کہ وہ ان واقعات کی مذمت کرے، مستقبل میں ایسے حملوں کی روک تھام یقینی بنائے اور سلامتی کونسل کی قرارداد 1701 سمیت بین الاقوامی وعدوں پر عمل درآمد کرائے۔