Raza Musani 
غزہ : صیہونی فوج نے جبالیہ میں خوراک کی تقسیم کے مرکز پر حملہ کردیا۔ ٹینکوں کی شیلنگ سے دس فلسطینی شہید اور کئی زخمی ہوگئے۔ دس دن سے محصور جبالیہ میں نہتے فلسطینیوں کو اس وقت نشانہ بنایا جب وہ خوراک کی تقسیم کے مرکز پر قطار میں کھڑے تھے۔ شیلنگ سے خواتین اور بچوں سمیت دس فلسطینی شہید ہوئے۔
اس سے پہلے صیہونی فوج نے دیرالبلاح میں الاقصیٰ شہید اسپتال میں لگے پناہ گزینوں کے کیمپ پر میزائل برسادئے۔ حملے میں خیموں میں آگ لگ گئی اور خواتین اور بچوں سمیت چار افراد شہید اور ستر سے زائد زخمی ہوگئے۔ جن میں سے کئی کی حالت تشویشناک بتائی جارہی ہے۔ اس سے پہلے صیہونی فوج نے نصیرات میں اسکول پر ٹینکوں سے گولہ باری کی تھی۔ اسکول میں سینکڑوں بے گھر افراد نے پناہ لے رکھی تھی۔ گولہ باری کے نتیجے میں بائیس شہری شہید جبکہ اسی زخمی ہوگئے۔ چوبیس گھنٹوں میں باسٹھ فلسطینی شہید اور دو سو کےقریب زخمی ہوئے۔ ادھر رفح میں جھڑپوں کے دوران ایک اسرائیلی فوجی مارا گیا۔
