اسرائیلی بربریت، ایک اور فلسطینی دم توڑ گیا، شہدا کی تعداد گیارہ ہوگئی

نابلس : فلسطین کے شہر نابلس پر صیہونی جارحیت میں شہید افراد کی تعداد گیارہ ہوگئی۔ شہدا کی اجتماعی تدفین میں ہزاروں افراد شریک ہوئے۔ مقبوضہ کنارے کے شہر نابلس پر صیہونی فوج کی چڑھائی میں زخمی ایک اور فلسطینی دم توڑ گیا۔ گذشتہ روز فائرنگ سے بزرگ سمیت دس فلسطینی شہید اورسوسے زائد زخمی ہوئے تھے جن میں سے 6 کی حالت تشویشناک ہے۔ صیہونی حملے میں شہید فلسطینیوں کے اجتماعی جنازے میں ہزاروں افراد شریک ہوئے۔۔ل اور اسرائیل سے انتقام لینے کے نعرے لگائے۔ گذشتہ روز صیہونی فوج درجنوں بکتر بند گاڑیوں اور خصوصی دستوں کے ساتھ شہرمیں داخل ہوئی اور دو مطلوب فلسطینی جنگجوؤں کے گھر کو گھیرے میں لینے سے پہلے شہر کے تمام داخلی راستے بند کردیے تھے۔ فلسطینی نوجوانوں نے شدید مزاحمت کی۔ رواں سال کےآغاز سے اب تک مقبوضہ علاقوں میں اسرائیلی فوج کے ہاتھوں شہید فلسطینیوں کی تعداد 13 بچوں سمیت 62 ہو چکی ہے۔