اسرائیلی حکام نے غزہ پر بھوک مسلط کردی ہے، سعودی کابینہ

ریاض : سعودی کابینہ نے غزہ میں اسرائیلی کارروائیوں کی مذمت کرتے ہوئے اسرائیلی حکام پر بھوک مسلط کرنے۔ نسل کشی اور دیگر خلاف ورزیوں کا الزام عائد کیا ہے۔ سعودی ولی عہد شہزادہ محمد بن سلمان کی زیر صدارت کابینہ کے اجلاس میں فلسطین کی صورتحال پر غور کیاگیا۔ اجلاس میں کہا گیاہے کہ بین الاقوامی برادری اور سلامتی کونسل اسرائیلی خلاف ورزیوں کو روکنے میں مسلسل ناکامی کا شکار ہے۔ اجلاس میں کہا گیاکہ اسرائیل انٹرنیشنل آرڈر اور قانونی حیثیت کی بنیادوں کو کمزور کر رہا ہے، اس سے علاقائی و عالمی امن اور سلامتی کو خطرہ ہے۔ اجلاس نے آرمینیا اور آذربائیجان کے درمیان امن معاہدے کے اعلان کا بھی خیرمقدم کرتے ہوئے خطے میں استحکام کی امید کا اظہار کیا۔ کابینہ کے اجلاس کے ایجنڈے میں شامل دیگر امور پر بھی غور کیا گیا اور متعدد اہم فیصلے اور معاہدوں کی منظوری دی گئی۔