Raza Musani 
بیروت : صیہونی فوج نے جنوبی لبنان کے علاقے زغاترا میں حملہ کرکے اٹھارہ افراد کو شہید اور کئی کو زخمی کردیا۔ صیہونی فوج نے رہائشی عمارتوں کو نشانہ بنایا جس سے بڑے پیمانے پر تباہی پھیلی۔ صیہونی فوج نے پہلی بار عیسائی اکثریتی علاقے کو نشانہ بنایا ہے۔ ادھر حزب اللہ نے صیہونی فوج کی دراندازی کی کوشش ناکام بنادی جس میں سات فوجی ہلاک و زخمی ہوئے۔ اس سے پہلے حزب اللہ کے حیفا میں فوجی اڈے پر ڈرون حملے میں چار صیہونی فوج ہلاک اور سو سے زائد زخمی ہوگئے۔ اسرائیلی میڈیا یدووت احرنوت کے مطابق دو ڈرونوں کے ذریعے حملہ کیا گیا۔ ایک ڈرون روک لیا گیا جبکہ دوسرے ڈرون نے حیفا میں اسرائیلی فوجی اڈے میں تباہی مچادی۔ اسرائیل نے تصدیق کی ہے کہ حزب اللہ کے ڈرون نے تل ابیب کے شمال میں واقعہ علاقے بنیامینہ سے متصل فوجی اڈے کو نشانہ بنایا۔ حزب اللہ نے دو ڈرون لانچ کیے جو سمندر کے راستے اسرائیلی فضائی حدود میں داخل ہوئے۔ اسے اسرائیل کے فوجی اڈّے پر ہونے والا سب سے تباہ کن حملہ سمجھا جا رہا ہے۔
