Raza Musani 
تہران: ایران نے اقوام متحدہ اور سیکورٹی کونسل سے مطالبہ کیا ہے کہ صیہونی حکومت کو عالمی عدالت کے فیصلے پر عملدرآمد پر مجبور کیا جائے۔ ایران کے عبوری وزیر خارجہ علی باقری کنی نے اقوام متحدہ اور سیکورٹی کونسل کے سربراہان کے نام ایک خط میں کہا ہے کہ اقوام متحدہ کا فرض ہے کہ وہ تمام رکن ممالک پر زور دے کہ وہ اسرائیل کی جارح حکومت کے ساتھ تعاون سے گریز کریں۔ خط میں کہا گیا ہے کہ فلسطین میں صیہونی حکومت کی بربریت کے حوالے سے اقوام متحدہ کو اپنی ذمہ داریوں پر عمل کرنا چاہئے۔ خط میں مزید کہا گیا ہے کہ عالمی برادری کے شدید ردعمل اور عالمی عدالت کے فیصلے کے باوجود صیہونی حکومت رفح میں انسانی حقوق پامال کررہی ہے۔ خط میں صیہونی فوج کے حملوں کو روکنے اور فلسطینیوں کو درپیش مشکلات کو حل کرنے کی ضرورت اور غزہ میں امدادی سامان کی ترسیل کے لئے رفح بارڈر کو کھولے جانے پر زور دیا گیا ہے اور مطالبہ کیا گیا ہے کہ فلسطینیوں کی نسل کشی کے بارے میں تحقیقات کے لئے ایک فیکٹ فائنڈنگ کمیٹی تشکیل دی جائے جو اقوام متحدہ کی نگرانی میں تحقیق کرکے اپنی رپورٹ پیش کرے۔
