اسرائیل کو حزب اللہ کے خلاف اپنی ناکامیوں سے سبق سیکھنا چاہیے، جنرل قاآنی

تہران : سپاہِ پاسدارانِ انقلاب کی قدس فورس کے سربراہ جنرل اسماعیل قاآنی کا کہنا ہے کہ اسرائیل کو حزب اللہ کے خلاف اپنی ناکامیوں سے سبق سیکھنا چاہیے اور یہ سمجھنا چاہیے کہ غزہ کا بھی اپنا طوفان ہے۔انہوں نے خبردار کیا کہ سیاسی قیادت کی پالیسیوں کے پیچھے چلنے سے اسرائیل مزید بحرانوں میں پھنس سکتا ہے۔ قدس فورس کے سربراہ بریگیڈیئر جنرل اسماعیل قاآنی نے سوشل میڈیا پر جاری بیان میں اسرائیل کو لبنان کی مزاحمتی تحریک حزب اللہ کے خلاف اپنے تجربات سے سبق لینے کا مشورہ دیا ہے۔ انہوں نے کہا کہ جب حزب اللہ کی مرصاد ڈرون صلاحیتوں کے بارے میں خبردار کیا گیا تو اسرائیل نے اسے سنجیدگی سے نہیں لیا اور نقصان اٹھایا۔ اسماعیل قاآنی نے کہا کہ غزہ کی مزاحمت کو بھی کمزور سمجھنے کی غلطی اسرائیل کے لیے سنگین نتائج کا باعث بن سکتی ہے۔ انہوں نے اپنے پیغام میں سوال اٹھایا کہ حالیہ حملوں میں ہونے والے اسرائیلی فوجی جانی نقصانات کی ذمہ داری کون قبول کرے گا۔ قاآنی کے مطابق اگر اسرائیل اپنی سیاسی قیادت کی پالیسیوں پر اسی طرح عمل کرتا رہا تو وہ مزید مشکلات اور بحرانوں کا شکار ہو سکتا ہے۔