Raza Musani 
بیروت: اسرائیل اور حزب اللہ کے درمیان جنگ بندی معاہدے پر عملدرآمد شروع ہوگیا ہے۔ گھروں کو واپس جانے والی گاڑیوں کی قطاروں سے سڑکوں پر ٹریفک جام ہوگیا۔ شہریوں نے معاہدے کا بھرپور خیرمقدم کیا ہے۔ دونوں فریقین معاہدے کے تحت ایک دوسرے پر حملے بند کردیں گے۔ 60 روز کے دوران اسرائیلی فوج لبنان سے نکل جائے گی اور سرحد پر لبنانی فوج ذمہ داریاں سنبھالے گی۔ سرکاری لبنانی سکیورٹی فورسز اور فوج واحد مجاز مسلح ادارہ ہوگا۔ جسے جنوبی لبنان میں ہتھیاراٹھانے یا فورسز چلانے کی اجازت ہوگی۔ لبنان میں ہتھیاروں یا ہتھیاروں سے متعلق مواد کی فروخت، فراہمی یا پیداوار کی نگرانی لبنانی حکومت کرے گی۔ معاہدے کے تحت اسرائیل اور لبنان دونوں کی منظوری سے ایک کمیٹی قائم کی جائے گی جو ان وعدوں پر عمل درآمد کو یقینی بنانے میں نگرانی اور مدد کرے گی۔
ادھر معاہدے کے باوجود اسرائیل نے جنوبی لبنان کے باشندوں کو فی الحال واپس نہ جانے کا حکم دیا ہے۔ امریکی صدر جوبائیڈن نے حزب اللہ اور اسرائیل کے درمیان معاہدے کا اعلان کرتے ہوئے کہا کہ امریکہ لبنان کے بعد غزہ میں بھی جنگ بندی کی مزید کوششیں کرے گا۔
