غزہ میں اسرائیلی فوج قتل عام اور غارت گری بند کرے، اسماعیل ہنیہ

دوحہ: حماس کے سربراہ اسماعیل ہنیہ نے خبردار کیا ہے کہ اگر غزہ کی پٹی میں اسرائیلی قتل عام جاری رہا تو جنگ بندی بے مقصد ہوجائے گی۔ فلسطینی مزاحمتی تنظیم حماس کے سیاسی ونگ کے سربراہ اسماعیل ہنیہ نے مطالبہ کیا ہے غزہ میں مکمل جنگ بندی کی جائے۔ انہوں نے مزید کہا کہ فلسطینیوں کو نقل مکانی پر مجبور کرنے کا سلسلہ جاری رہا تو یہ کسی کے مفاد میں نہیں ہوگا۔ اسماعیل ہنیہ کا کہنا تھا کہ ایسی جنگ بندی جس میں اسرائیلی غارت گری،قتل عام اور فلسطینیوں کی نقل مکانی روکنے کا انتظام نہ ہو بے مقصد اور فضول ہوگی۔ حماس ایک حقیقت ہے اور اس کے بغیر غزہ میں کسی سیاسی حل کا کوئی مطلب نہیں ہوگا۔ ہم غزہ کے عوام کا ہر فیصلہ قبول کریں گے لیکن مسلط کردہ کوئی فیصلہ قبول نہیں کیا جائے گا۔