جنگ کے خاتمہ سے متعلق ایرانی مؤقف حقیقت کے قریب ہے، روس

جنیوا : روس نے کہاہےکہ ایران جنگ کے خاتمے سے متعلق مذاکرات کی جو تصویر پیش کر رہا ہے وہ حقیقت کے زیادہ قریب ہے۔ جبکہ امریکا پیش رفت کو بڑھا چڑھا کر بیان کر رہا ہے۔ روس کے جنیوا میں بین الاقوامی تنظیموں کے لیے سفیر میخائل اولیانوف نے کہا کہ واشنگٹن اس مرحلے پر مذاکرات میں ہونے والی پیش رفت کو حقیقت سے زیادہ ظاہر کر رہا ہے۔ میخائل اولیانوف کے مطابق امریکی پیغام رسانی اس وقت کم ذمہ دارانہ دکھائی دیتی ہے جبکہ ایران نسبتاً محتاط انداز میں بات کر رہا ہے۔ یہ بیان ایسے وقت سامنے آیا ہے جب امریکا اور ایران کے درمیان کشیدگی کم کرنے اور ممکنہ معاہدے کے لیے بالواسطہ مذاکرات جاری ہیں۔