ایرانی وزیرخارجہ کی سعودی ہم منصب سے ملاقات

ریاض : ایرانی وزیر خارجہ عباس عراقچی نے ریاض کا دورہ کیا اور سعودی عرب کے وزیر خارجہ شہزادہ فیصل بن فرحان سے خطے کی صورتحال پر تبادلہ خیال کیا۔ ملاقات میں علاقائی مسائل۔ غزہ کی پٹی اور لبنان میں اسرائیلی جرائم کو روکنے پر بات چیت کی گئی۔ عباس عراقچی نے ملاقات کے بعد صحافیوں کو بتایا کہ ایران اور سعودی عرب کے درمیان تعلقات ایک اچھی سمت میں آگے بڑھ رہے ہیں۔ میرے دورے کا مقصد علاقائی مسائل، لبنان اور غزہ کی صورت حال اور صیہونی حکومت کے جرائم کے بارے میں مشاورت کرنا ہے۔ عراقچی نے مزید کہا کہ اس دورے کا ایک اور اہم ہدف لبنان میں موجود مہاجرین کی مدد کے بارے میں گفتگو اور مشاورت کرنا ہے۔ انہوں نے واضح کیا کہ ہمیں امید ہے کہ یہ بات چیت فلسطین اور لبنان کے لئے بہتر حالات اور بالآخر خطے میں امن کا باعث بنے گی۔
ایرانی وزارت خارجہ کے ترجمان اسماعیل بغائی نے ایرانی وزیرخارجہ کے خطے کے دورے سے متعلق کہا کہ ایران اپنے ہمسایہ ممالک کے ساتھ تعلقات کو مزید مضبوط کرنے کے لیے پرعزم ہے تاکہ خطے کی تمام اقوام کے ساتھ امن و سلامتی سمیت اقتصادی تعاون کو یقینی بنایا جا سکے۔