ایران کبھی بھی دباؤ، پابندیوں اور جارحیت کے سامنے نہیں جھکے گا، مسعود پزشکیان

تہران : ایرانی صدر مسعود پزشکیان نے واضح کیا کہ ایران بین الاقومی قوانین اور اصولوں کے تحت اسماعیل ہنیہ کی اپنی سرزمین پر شہادت کا جواب دینے کا حق رکھتا ہے۔ انہوں نے کہا کہ ایران کبھی بھی دباؤ، پابندیوں، دھونس اور جارحیت کے سامنے نہیں جھکے گا۔ ایرانی صدر نے یورپی رہنماؤں سے کہا کہ اسرائیل کو غزہ میں مظالم بند کرنے پر مجبور کرنا عالمی برادری کی ذمہ داری ہے۔ امریکا اور مغربی ممالک کی شہ پر اسرائیلی وزیراعظم نتین یاہو غزہ میں سفاکانہ قتل عام میں مصروف ہے۔ اسرائیل نا صرف غزہ بلکہ ایران سمیت دیگر ممالک میں دہشت گردانہ کارروائیاں کررہا ہے جس کو نظر انداز کیا جارہا ہے۔ ایران جرمنی سمیت دنیا کے تمام ممالک سے دوستانہ تعلقات کا خواہاں ہیں۔ تاہم مغرب کو بھی عالمی امن کے لیے اپنا کردار ادا کرنا ہوگا۔