Raza Musani 
کراچی : ایران نے پاکستان کے زرعی شعبے میں ڈھائی کروڑ ڈالر سرمایہ کاری کی پیشکش کردی۔ ایران کے قونصل جنرل حسن نوریان نے وزیراعلیٰ سندھ کے مشیر زراعت سندھ منظور حسین وسان سے ملاقات کی اور دو طرفہ تجارت اور زرعی سیکٹر کے تعاون پر تبادلہ خیال کیا۔اس موقع پر حسن نوریان نے سندھ حکومت کو ٹریکٹرز، کمبائنڈ ہارویسٹرس اور دیگر زرعی مشینری دینے کی بھی پیشکش کی اور کہا کہ سیڈ، کولڈ اسٹوریج اور ہائبرڈ سیڈ دیگر ممالک سے سستی قیمت پر فراہم کریں گیں، ایران سندھ میں زرعی سیکٹر اور دیگر شعبوں میں 25 ملین ڈالر کی سرمایہ کاری کرنا چاہتا ہے، ایران کراچی چیمبر آف کامرس سے بھی باہمی معاشی تعاون بڑھانا چاہتا ہے۔ منظور حسین وسان نے گفتگو کرتے ہوئے کہا کہ سندھ کا ضلع خیرپور لاکھوں ٹن کھجور پیدا کرتا ہے جو دیگر ممالک میں ایکسپورٹ کی جاتی ہے، سندھ میں پانی کی قلت کی وجہ سے سندھ حکومت کسانوں کی خواہش پر نئی زرعی ٹیکنالوجی متعارف کروارہی ہے، ٹنڈوالہیار اور حیدرآباد کے کیلے ایران کو ایکسپورٹ کیے جاتے ہیں۔
