ایران اور عمان کا آبنائے ہرمز میں عارضی میری ٹائم کوریڈور پر اتفاق

تہران: ایران اور عمان نے آبنائے ہرمز میں عارضی میری ٹائم کوریڈور پر اتفاق کرلیا۔ نائب وزیر خارجہ کاظم غریب آبادی نے کہا ہےکہ یہ انتظام مستقل راستہ طے ہونے تک عارضی بنیادوں پر کیا گیا ہے۔
ایران کے وزیر خارجہ عباس عراقچی اور عمان کے وزیر خارجہ سید بدر بن حمد بن حمود البوسعیدی نے تہران میں ملاقات کی۔ دونوں رہنماؤں نے آبنائے ہرمز میں عارضی بحری راہداری قائم کرنے اور بارودی سرنگیں صاف کرنے کے منصوبے پر بات چیت کی۔ عمانی وزیر خارجہ بدر ابو سعید نے کہاکہ ہم جلد ہی آبنائے ہرمز کے لیے ایک عارضی راہداری کے قیام اور جہاز رانی کے تحفظ کی بحالی کے لیے عملی اقدامات کا اعلان کریں گے۔ انہوں نے بتایا کہ ایران اور عمان کے درمیان مزید مذاکرات متوقع ہیں، جو 30 سے 60 دن تک جاری رہ سکتے ہیں۔
ایرانی نائب وزیر خارجہ کے مطابق مذاکرات کے دوران آبنائے ہرمز کے لیے ایک مستقل راستہ طے کرنے کی کوشش کی جائے گی۔ غریب آبادی نے واضح کیا کہ آبنائے ہرمز کو مکمل طور پر دوبارہ کھولنے کا انحصار ایران کے مطالبات پورے ہونے پر ہے۔