طالبان حکام کی کئی ممالک میں اپنے سفارتی مشنز سے لاتعلقی

کابل: افغانستان میں طالبان حکام نے کئی ممالک میں اپنے سفارتی مشنز سے لاتعلقی کا اعلان کردیا۔ کابل کی عبوری انتظامیہ نے کہا کہ اُن کی حکومت نے مغربی ملکوں میں اپنے سفارتخانوں اور اُن افغان قونصلرز سے تعلقات ختم کر دیے ہیں جہاں پر موجود اسٹاف سابق حکمرانوں کا ہمدرد ہے۔ نیوزایجنسی اے ایف پی کے مطابق افغان وزارت خارجہ نے کہا ہے کہ وہ اُن افغان سفارت خانوں سے جاری کیے گئے ویزوں اور ایسے افراد کے پاسپورٹس کی ذمہ داری نہیں لیں گے جنہوں نے کابل کی نئی حکومت سے تعلق نہیں رکھا۔ وزارت خارجہ نے جن ممالک میں سفارتخانوں کی ذمہ داری لینے سے معذرت کی ہے اُن میں برطانیہ۔ جرمنی۔ بلجیئم، سوئٹزرلینڈ، آسٹریا، فرانس، اٹلی، یونان، پولینڈ، سویڈن، ناروے، کینیڈا اور آسٹریلیا شامل ہیں۔ بیان میں مزید کہا گیا ہے کہ بدقسمتی سے زیادہ تر سفارتی مشنز کا طریقہ کار اور رابطے موجودہ انتظامیہ اور مروجہ اصولوں کے منافی ہے۔