Raza Musani 
لکھنؤ: بھارتی ریاست اترپردیش کے ضلع ہاتھرس میں مذہبی تقریب کے دوران بھگدڑ سے ایک سو سات افراد ہلاک اور کئی زخمی ہوگئے۔ افسوسناک واقعہ ضلع ہاتھرس کے سکندرا راؤ تھانے کی حدود میں واقع پھولرائی گاؤں میں پیش آیا۔ مذہبی تقریب بھولے بابا کے ستسنگ ختم ہونے کے بعد عقیدت مند واپس جارہے تھے کہ بے تحاشہ رش کی وجہ سے بھگدڑ مچ گئی اور لوگ پیروں تلے کچلے گئے۔ عینی شاہدین نے بتایا کہ سڑک سے جیسے ہی رکاوٹیں ہٹائی گئیں لوگوں نے نکلنے کی کوشش کی جس سے کئی لوگ اونچائی پر واقع سڑک سے نیچے نالے میں جاگرے۔ لوگوں نے زخمیوں اور لاشوں کو بسوں، ٹیمپو اور دوسری گاڑیوں میں اسپتال پہنچایا۔ سو سے زیادہ زخمیوں میں کئی کی حالت نازک ہے۔ مرنے والوں میں بیشتر خواتین اور بچے شامل ہیں۔ وزیراعلیٰ یوگی ادتیہ ناتھ نے واقعہ کی تحقیقات اور زخمیوں کے مناسب علاج کا حکم دیا ہے۔
