حکومت کو ایک ہی دن الیکشن کرانا ہیں تو 14مئی سے پہلے اسمبلی توڑنا ہوگی، عمران خان

لاہور: سابق وزیراعظم عمران خان نے واضح دوٹوک الفاظ میں کہا ہے کہ حکومت کو ایک ہی دن الیکشن کرانے ہیں تو چودہ مئی سے پہلے اسمبلی توڑنا ہوگی۔ عمران خان نے حکومت سے مذاکرات جاری رکھنے کا اعلان کرتے ہوئے کہا ہے کہ منگل کو ہماری ٹیم بات چیت کے لیے جائے گی۔ حکومت 14 مئی کے اندر اسمبلیاں تحلیل کردے تو ہم ایک تاریخ کو الیکشن کیلئے تیار ہیں۔ حکومت کہہ رہی ہے کہ بجٹ پاس کرنے کے کےبعد الیکشن کروائیں گے۔ اس میں بد نیتی نظر آرہی ہے۔ اگر آپ بجٹ پیش کرنا چاہتے ہیں تو انتخابات جیت کر عوامی مینڈیٹ سے آئیں اور بجٹ پیش کریں۔ بجٹ کے بعد اسمبلیاں تحلیل کرنا ہمیں قبول نہیں۔ انہوں نے کہا کہ الیکشن کی امید چلی گئی تو پاکستان کا حال سری لنکا سے بدتر ہو جائے گا۔ پہلے ن لیگ والے کہتے تھے الیکشن کروانے ہیں تو اسمبلیاں توڑیں، جب ہم نے اسمبلیاں تحلیل کیں تو یہ الیکشن سے بھاگ گئے۔ چیئرمین پی ٹی آئی نے کہا کہ ہمارے اسمبلیاں توڑنے کی ایک وجہ وفاق سے صوبوں کو فنڈز کی عدم فراہمی تھی۔ انہوں نے کہا کہ سپریم کورٹ پنجاب میں الیکشن کا کہہ چکی ہے، خیبر پختونخوا میں الیکشن کیلئے سپریم کورٹ جارہے ہیں، اگر آپ نے 14 مئی سے پہلے اسمبلیاں نہ توڑیں تو پھر ہم دو صوبوں میں الیکشن کروائیں گے۔
چیئرمین پی ٹی آئی نے کہا کہ پیر کو اسلام آباد، پشاور، لاہور میں لیبر ڈے پر ریلی نکال رہے ہیں، لاہور کی ریلی کی قیادت میں کروں گا، ریلی کا مقصد آئین بچاؤ پاکستان بچاؤ ہے۔