ملک بھر میں طوفانی بارش، برساتی ریلے، حادثات میں 80 افراد جاں بحق

کراچی : ملک بھر میں طوفانی بارشوں سے اموات کی تعداد 80 سے تجاوز کرگئیں، بارشوں نے بلوچستان میں سب سے زیادہ تباہی مچائی جہاں 16خواتین اور 13بچوں سمیت 42 افراد ریلوں اور مکانات گرنے سے ہلاک ہوئے۔ تیز بارشوں کے سبب کاکڑ خراسان میں ڈیم ٹوٹ گیا، دکی ڈیم میں دراڑ پڑ گئی،کھنی بواٹہ ڈیم اوور فلو کر گیا، آبادی کو بچانےکی کوششیں جاری ہیں۔دوسری جانب ہرنائی میں پہاڑوں سے آنے والا ریلا شہر میں داخل ہوگیا ہے، سڑکیں ندی نالوں کا منظر پیش کر رہی ہیں۔ غذر میں آسمانی بجلی گرنے اور لینڈ سلائیڈنگ سے جاں بحق افراد کی تعداد 8 ہوگئی ہے۔ لاہور سمیت پنجاب کے مختلف شہروں میں بھی بارشوں کا سلسلہ جاری ہے، رحیم یار خان میں نشیبی علاقے زیر آب آگئے، گلی محلے تالاب کا منظر پیش کرنے لگے ہیں۔ملتان میں چھت اور دیوار گرنے کے دو واقعات میں 3 بچے جاں بحق اور 2 خواتین زخمی ہوگئیں۔