القسام بریگیڈ کا شدید حملہ، متعدد اسرائیلی فوجی ہلاک و زخمی

غزہ : حماس کے عسکری ونگ القسام بریگیڈز نے خان یونس کے مشرق میں اسرائیلی فوج کے انجینیئرنگ یونٹ کو نشانہ بنایا ہے۔ جس کے نتیجے میں متعدد اسرائیلی فوجی ہلاک اور زخمی ہوئے۔ اس سے قبل القسام بریگیڈز نے ایک کامیاب حملے میں دھماکہ خیز مواد اور یاسین 105 پروجیکٹائل کا استعمال کرتے ہوئے اسرائیلی فوج کی دو گاڑیاں تباہ کیں اور 2 ڈی 9 فوجی بلڈوزر کے ساتھ ایک مرکاوا ٹینک کو نشانہ بنایا تھا۔
دوسری جانب نہتے فلسطینیوں پر اسرائیلی فوج کی بربریت جاری ہے، ظالم فوج نے غزہ شہر میں اسکول پر بم باری کی جس کے نتیجے میں 6 افراد شہید ہوئے۔ اسرائیلی فوج نے نصیرات کیمپ میں بھی 2 گھروں پر حملے کیے جس کے نتیجے میں شہید ہونے والے افراد کی تعداد 13 ہو گئی ہے۔ علاوہ ازیں نابلس میں اسرائیلی فوج نے 1 شخص کو گولی مار کر زخمی کر دیا اور اسے طبی امداد دینے پر ریڈ کریسنٹ سوسائٹی کے عملے کو حراست میں لے لیا۔