Raza Musani 
فلسطینی مزاحمتی تحریک حماس کے مرکزی رہنماء اسمعیل ہنیہ نے ایران میں اسلامی انقلاب کی کامیابی کی 43 ویں سالگرہ کی مناسبت سے ایرانی سپریم لیڈر آیت اللہ سید علی خامنہ ای کے نام ایک تہنیتی خط ارسال کیا ہے جس میں انہوں نے اس پر مسرت موقع پر مبارکباد پیش کرتے ہوئے مسئلہ فلسطین کے حوالے سے ولی امر المسلمین کے دوٹوک و اصولی موقف پر ان کا شکریہ ادا کیا۔ عرب چینل المیادین کے مطابق اسمعیل ہنیہ نے اپنے خط میں اس بات پر تاکید کرتے ہوئے کہ ایران میں اسلامی انقلاب کی کامیابی مزاحمتی محاذ کی ایک بڑی فتح تھی، لکھا کہ ہم، فلسطینی قوم اور اس کے مقدس مسئلے کی حمایت میں آپ کے درخشاں موقف پر دل کی گہرائیوں سے فخر کرتے ہیں۔
حماس کے مرکزی رہنماء نے لکھا کہ ہم حماس میں فلسطینی قوم کے ہمراہ اس پرمسرت موقع پر آپ کی خوشیوں میں شریک ہیں اور اس ذریعے سے فلسطین کے شانہ بشانہ کھڑے رہنے اور مسئلہ فلسطین، فلسطینیوں، ان کے عادلانہ ارمانوں، ان کے مزاحمتی محاذ اور اپنے حقوق سے دفاع کی ان کی قانونی و دلیرانہ تحریک کی حمایت سے متعلق آپ کے باوقار و مسلسل موقف پر آپ کا شکریہ ادا کرتے ہیں! انہوں نے اپنے خط کے آخر میں تاکید کی کہ حماس نے، فلسطینی ارمانوں کو لاحق خطرات و درپیش چیلنجوں کے حوالے سے، (ایران کے) اس موقف میں توسیع اور فلسطینی فتحیابی، اس ملک کی عوام کی اور ان کے مزاحمتی محاذ کی حمایت میں (ایران کے) اس کردار کے تسلسل پر نگاہیں جما رکھی ہیں۔
