عالمی بےحسی برقرار، جبالیہ، خان یونس میں درندگی، نہتے خواتین و بچوں سمیت 250 سے زائد فلسطینی شہید

غزہ : صیہونی فوج نے جبالیہ کے بعد خان یونس میں قیامت برپا کردی۔ وحشیانہ حملے میں 38 فلسطینی شہید ہوگئے۔ صیہونی فوج نے خان یونس میں رہائشی مقامات کو نشانہ بنایا جس سے تباہی مچ گئی۔ ان حملوں میں اب تک اڑتیس فلسطینیوں کی شہادت کی تصدیق ہوسکی ہے۔ جبکہ کئی زخمی ہیں اس سے پہلے اسرائیلی فوج نے شمالی غزہ کے شہر جبالیہ میں درجنوں عمارتیں مکینوں سمیت دھماکے سے تباہ کردیں۔ درندگی کے اس مظاہرے میں دو سو دس سے زائد فلسطینی شہید ہوگئے ہیں۔
اکیس دن سے جاری محاصرے کے دوران اب تک اسرائیلی فوج علاقے میں ایک ہزار سے زائد فلسطینیوں کو شہید اور تین ہزار سے زائد کو زخمی کرچکی ہے۔ ادھر کمال عدوان اسپتال پر اسرائیلی فوج کے حملے میں دس بچوں سمیت سترہ افراد شہید اور متعدد زخمی ہوئے ہیں۔