امریکا میں شدید برفانی طوفان، نظام زندگی درہم برہم، ہزاروں پروازیں منسوخ

واشنگٹن : امریکا کے شمال مشرقی علاقوں میں برفانی طوفان نے زندگی درہم برہم کردی۔ نیویارک، بوسٹن اور نیو جرسی میں ہنگامی حالت نافذ کردی گئی ہے۔ مشرقی علاقوں میں برفانی طوفان کے بعد شدید سردی کی لہر کے باعث لوگ گھروں میں محصور اور ہزاروں بجلی سے محروم ہو گئے۔ برفانی طوفان کے بعد شدید سردی کی لہر جاری ہے۔ فلاڈیلفیا، نیویارک اور میساچوسٹس میں شدید برفباری کے بعد درجہ حرارت نقطۂ انجماد سے نیچے گر گیا۔ میسا چوسٹس کے قصبے شیرون میں 30 انچ تک برف پڑی۔ صورتحال کے باعث پانچ ہزار سے زائد پروازیں منسوخ کردی گئی ہیں۔ طوفان کی وجہ سے شکاگو ایئرپورٹ پر چائنا ایئر لائنز کا کارگو جہاز رن وے پر کنٹرول کھو بیٹھا۔ امریکا کی دس شمال مشرقی ریاستوں میں برفانی طوفان کی پیش گوئی کی گئی تھی۔