ٹرمپ سے اپنے بھی خفا، ووٹ نہ دینے کا اعلان

جارج بش، جیب بش، کولن پاول،مٹ رومنی جیمزمیٹس شامل
واشنگٹن (نیوز ڈیسک)امریکی صدر ڈونلڈ ٹرمپ کی متعصبانہ اور جارحانہ پالیسیوں پر ان کے اپنے بھی خفا ہیں اور ری پبلکن پارٹی کے سرکردہ رہنماو¿ں نے دوبارہ صدارت کے امیدوار ڈونلڈٹرمپ کو ووٹ نہ دینے کا اعلان کر دیا، سابق صدر جارج بش نے واضح کیا ہے کہ وہ ڈونلڈٹرمپ کو ووٹ نہیں دیں گے،ان کے بھائی اور فلوریڈا کے سابق گورنر جیب بش بھی ٹرمپ کو ووٹ دینے کے حوالے سے مخمصے کا شکار ہیں،سابق وزیر خارجہ کولن پاو¿ل نے صدرٹرمپ کو پکا جھوٹا قرار دیا اور کہا کہ وہ اس بار ڈیموکریٹ امیدوار جو بائیڈن کو ووٹ دیں گے۔ ریپبلکن صدارتی امیدوار بننے کے سابق خواہش مند مٹ رومنی نے بھی دوٹوک اندازمیں کہہ دیا ہے کہ وہ صدر ٹرمپ کے حامی نہیں، ریپبلکن سینیٹر لیزا مرکووسکی پہلے ہی کہہ چکی ہیں کہ ٹرمپ کی حمایت جاری رکھنا مشکل ہوگیا ہے۔ ٹرمپ دور کے پہلے وزیر دفاع جیمز میٹس بھی ٹرمپ کے خلاف انتہائی سخت کالم لکھ چکے ہیں۔