Raza Musani 
واشنگٹن : امریکا نے سعودی عرب اور اسرائیل کے درمیان تعلقات بحالی کی کوششیں تیز کردی ہیں۔ غیر ملکی میڈیا ایکزیوس Axios کی رپورٹ کے مطابق وائٹ ہاؤس کے قومی سلامتی مشیر جیک سلیوان جمعرات کو سعودی عرب کا دورہ کریں گے جہاں وہ ولی عہد شہزادہ محمد بن سلمان سے ملاقات کریں گے۔ اور ایک بڑے معاہدے پر بات کریں گے جس میں اسرائیل سے تعلقات کی بحالی بھی شامل ہے۔ رپورٹ کے مطابق وائٹ ہاؤس کی جانب سے امریکا سعودی دفاعی معاہدے اورسعودی سویلین ایٹمی پروگرام کے لیے امریکی حمایت سے متعلق معاہدوں کا مسودہ تیار کرنے کی کوششیں جاری ہیں۔ رپورٹ کے مطابق امریکی حکام کو امید ہے کہ ریاض کے ساتھ دو طرفہ معاہدہ طے پا سکتا ہے۔ جسے اسرائیلی وزیر اعظم بنیامین نیتن یاہو کے سامنے رکھا جائے گا اور اس میں دو ریاستی حل کی کوشش کی شق بھی شامل ہوگی۔
