افغانستان میں درگاہ پر حملہ، 11 افراد شہید، متعدد زخمی

کابل : افغانستان کے صوبے بغلان میں صوفی درگاہ پر مسلح شخص نے دھاوا بول دیا۔ اندھا دھند فائرنگ میں 11 افراد شہید جب کہ متعدد زخمی ہوگئے۔ طالبان کی وزارت داخلہ نے تصدیق کی ہے کہ ایک حملہ آور نے ضلع نہرین میں ایک صوفی بزرگ کی درگاہ میں ہفتہ وار تقریب میں موجود زائرین کو نشانہ بنایا ہے مقامی افراد نے بتایا کہ حملہ سید پاچا آغا کے مزار پر اس وقت کیا گیا جب وہاں عشا کی نماز ادا کی جا رہی تھی۔ درگاہ میں درجن سے زائد نمازی موجود تھے۔ شہید اور زخمی ہونے والے نمازیوں کو قریبی اسپتال منتقل کیا گیا جہاں گیارہ شہادتوں کی تصدیق کردی گئی۔