خطے کے استحکام کیلئے دوطرفہ تعلقات اہم ہیں، سعودیہ، عراق متفق

بغداد : عراق اور سعودی عرب نے خطے کے استحکام کے لئے دونوں ممالک کے تعلقات کو اہم قرار دیا ہے۔ سعودی وزیر خارجہ شہزادہ فیصل بن فرحان نے عراق کا دورہ کیا جہاں انہوں نے صدر عبداللطیف جمال رشید سے ملاقات کی جس میں خطے اور دنیا بھر کے تازہ سیاسی حالات پر تبادلہ خیال کیا گیا۔ عراقی صدر نے کہاکہ دونوں ممالک خطے کے استحکام کے حوالے سے بنیادی ستون کا درجہ رکھتے ہیں۔ بحران مکالمے اور مشاورت کے ذریعے حل کیے جائیں۔ تمام اقوام کی سلامتی اور امن کے لیے بحرانوں کا تصفیہ مکالمے کے ذریعے ہی کیا جائے۔ سعودی وزیر خارجہ نے عراقی ہم منصب ڈاکٹر فواد حسین کے ہمراہ مشترکہ پریس کانفرنس بھی کی۔ سعودی وزیر خارجہ نے کہا کہ ان کا ملک امن واستحکام کے فروغ کے حوالے سے جاری کوششوں میں عراق کے ساتھ ہے۔