Raza Musani 
نیویارک: سیکریٹری جنرل اقوام متحدہ انتونیو گوتریس نے کہا ہے کہ لبنان میں امن دستوں پر حملے جنگی جرم بن سکتے ہیں۔ انتونیو گوتریس نے کہا کہ یو این آئی ایف آئی ایل کے اہلکار اور مقامات کو نشانہ نہیں بنایا جانا چاہیے، امن مشنز پر حملے بین الاقوامی قوانین کی خلاف ورزی ہے۔ یہ جنگی جرائم بن سکتے ہیں۔ انہوں نے کہا کہ جنوبی لبنان میں اسرائیلی ٹینک امن دستے کے بیس میں گھس گئے تھے، حالیہ دنوں میں یو این مشن پر اسرائیلی حملے اور خلاف ورزی کا یہ تازہ واقعہ ہے۔ امن دستے تمام پوزیشنز پر موجود رہیں گے، جہاں امن دستے تعینات ہیں وہاں اقوام متحدہ کا جھنڈا لہراتا رہے گا۔ اس سے پہلے اسرائیلی وزیر اعظم نے انتونیو گوتریس سے مطالبہ کیا تھا کہ وہ لبنان میں اقوام متحدہ کی فوج کو فوری طور پرسرحد سے ہٹا دیں۔ نیتن یاہو نے کہا کہ اسرائیلی فوج نے بارہا اقوام متحدہ سے فوجیوں کو نکالنے کے لیے کہا ہے۔ خطے میں ان کی موجودگی انہیں حزب اللہ کے ہاتھوں یرغمال بنا سکتی ہے۔ امن فوج کو نہ نکال کر آپ ان کی زندگیوں کو خطرے میں ڈال رہے ہیں۔ لبنانی وزیر اعظم نجیب میقاتی نے لبنانی سرحد سے امن فوج کو ہٹانے کے نیتن یاہو کے مطالبے کی شدید مذمت کی ہے۔
