حضرت فاطمہ ؑکی شان ِاقدس میں گستاخی ناقابل قبول ہے،قومی اسمبلی میں قرار دادمنظور

اشرف جلالی کی حضرت فاطمہ (س)کی شان میں گستاخی قابل مذمت ہے، حکومتی سطح پراس کے خلاف اقدامات اٹھائے جانا ناگزیر ہوچکا ہے،متفقہ قرارداد
وزیر قانون پنجاب نے پولیس کواشرف جلالی کیخلاف کارروائی کرنے کی ہدایت کر دی،آصف جلالی کا نام فورتھ شیڈول میں ڈال دیا جائے،وزیرقانون
اسلام آباد/لاہور)نیوز ڈیسک) قومی اسمبلی میں گستاخ دختر رسول حضرت فاطمہ ؑاشرف آصف جلالی کے خلاف قرار داد متفقہ طور پر منظور کر لی گئی، قرارداد پیپلز پارٹی کی رکن قومی اسمبلی شگفتہ جمالی نے پیش کی، قرار دار میں کہا گیا کہ رسول اکرم حضرت محمد نے فرمایا کہ فاطمہ(س) میرے جسم کا ٹکڑا ہے جس نے اسے اذیت پہنچائی اس نے مجھے اذیت پہنچائی یہ فورم اشرف جلالی کی جانب سے سوشل میڈیا پر حضرت فاطمہؑ کی شان میں گستاخی کی شدید مذمت کرتا ہے اور اسے پوری امت کی دل آزاری تصور کرتا ہے ،سیدہ فاطمہؑ کی شان میں گستاخی اسلامی تعلیمات کے منافی اور ناقابل قبول ہے ،قرارداد میں کہا گیا کہ یہ فورم اس گستاخی کو قومی بیانیے اور پیغام پاکستان کے متفقہ اعلامیہ کے خلاف سنگین جرم قرار دیتے ہوئے مطالبہ کرتا ہے کہ حکومتی سطح پراس کے خلاف اقدامات اٹھائے جانا ناگزیر ہوچکا ہے،ادھر پنجاب اسمبلی کے اجلاس میں بھی توہین سیدہ سلام اللہ علیہا کا ایشو نمایاں رہا، اجلاس میں بجٹ بحث کے دوران رکن پنجاب اسمبلی کاظم پیرزادہ نے کہا کہ ڈاکٹر اشرف جلالی کی جانب سے دختر رسول سلام اللہ علیہا کی شان میں گستاخی کی مذمت کرتا ہوں، سابق وزیر اطلاعات پنجاب سید صمصام بخاری نے کہا کہ جس طرح پنجاب اسمبلی میں صحابہ کرام ؓکے تقدس اور عقیدہ ختم نبوت پر بات کی گئی ہے، اسی طرح اہلبیت اطہارؑ کے تقدس پر بھی قانون سازی کی جائے، اس پر وزیر قانون پنجاب محمد بشارت راجہ نے کہا کہ ایک شخص کے فعل سے ہر مسلمان کا دل دکھا ہے۔ انہوں نے کہا کہ آصف جلالی کیخلاف مقدمہ درج کر لیا گیا ہے جبکہ اس بات کو بھی یقینی بنایا جا رہا ہے کہ آصف جلالی کا نام فورتھ شیڈول میں ڈال دیا جائے،انہوں نے معزز ایوان کو یقین دلایا کہ آصف جلالی کو جلد گرفتار کرکے قرار واقعی سزا دی جائے گی ، وزیر قانون پنجاب محمد بشارت راجہ نے لاہور پولیس کو آصف اشرف جلالی کیخلاف قانون کے مطابق کارروائی کرنے کی ہدایت کر دی ہے۔