امریکا معاشی مفادات اور لاگت و فائدے کی زبان بہتر طور پر سمجھتا ہے، محمد مخبر

تہران : ولی امر مسلمین کے مشیر محمد مخبر نے خبردار کیا ہے کہ اگر امریکا۔ایران مفاہمتی یادداشت پر مکمل عمل درآمد نہ ہوا تو مغربی ایشیا میں توانائی کی ترسیل متاثر ہو سکتی ہے۔ ان کا کہنا ہے کہ ایران اپنے حقوق کی بحالی اور معاہدے کی مکمل تکمیل سے کم کسی چیز پر راضی نہیں ہوگا۔ محمد مخبر نے سوشل میڈیا پر جاری بیان میں کہا ہے کہ حالیہ امریکا۔ایران مفاہمتی یادداشت پر صرف کاغذی اتفاق کافی نہیں بلکہ اس پر عملی عمل درآمد ضروری ہے۔ انہوں نے دعویٰ کیا کہ معاہدے کی پہلی شق، جس کے تحت لبنان سمیت تمام محاذوں پر جنگ کا خاتمہ ہونا تھا، اب تک مکمل طور پر نافذ نہیں کی گئی۔ محمد مخبر نے خبردار کیا کہ اگر معاہدہ عملی شکل اختیار نہ کر سکا تو مغربی ایشیا میں توانائی کے بہاؤ پر بھی اثرات مرتب ہو سکتے ہیں۔ ان کا کہنا تھا کہ امریکا معاشی مفادات اور لاگت و فائدے کی زبان بہتر طور پر سمجھتا ہے۔ انہوں نے زور دے کر کہا کہ ایرانی مذاکرات کار معاہدے کی مکمل تکمیل اور قومی حقوق کی بحالی سے کم کسی نتیجے کو قبول نہیں کریں گے۔ محمد مخبر نے کہا کہ ایران اپنے شہداء کے خون کو نہ بھولے گا اور نہ ہی معاف کرے گا۔ ان کے مطابق ملک کی قیادت اور عوام اپنے قومی مفادات اور خودمختاری کے تحفظ کے لیے پرعزم ہیں۔