Raza Musani 
لاہور : وفاق المدارس الشیعہ پاکستان نے ملک بھر سے ملحقہ دینی مدارس کا دوروں کا آغاز کردیا۔ نائب صدر علامہ سید مرید حسین نقوی نے مولانا لعل حسین قمی کے ہمراہ لاہور سے دورے کا آغاز کیا ہے۔دورے کا مقصد طلبا و طالبات کے مدارس کی کارکردگی، طلبا اور مدرسین کے مسائل اور تعلیمی امور کا جائزہ لینا ہے۔ وفاق المدارس کے جدید تعلیمی نصاب اور بہتر کارکردگی کے حوالے سے بھی رائے لی جارہی ہیں۔ علامہ مرید نقوی نے واضح کیا ہے کہ وفاق المدارس الشیعہ نے 1985 میں محسن ملت علامہ صفدر حسین نجفی رحمتہ اللہ علیہ کی سربراہی میں اپنے سفر کا آغاز کیا۔ اس وقت سے اب تک اللہ تعالیٰ کے فضل و کرم سے مدارس کے امتحانات کے نظام ، نصاب اور قرآن و حدیث، تعلیمات معصومین علیہم السلام کے فروغ کے حوالے سے اپنی خدمات سرانجام دے رہا ہے ۔ انہوں نے کہا کہ وفاق المدارس کے نصاب کو جدید تقاضوں کے مطابق اپ ڈیٹ کیا جاتا رہا ہے۔ جس کے لئے مختلف سطحوں پر مشاورتی عمل جاری رہتا ہے۔ علامہ مرید نقوی لاہور کے بعد پنجاب کے دیگر اضلاع کا بھی دورہ کریں گے۔ جس کے بعد سندھ ، بلوچستان ، خیبر پختونخواہ، گلگت بلتستان اور آزاد کشمیر کے دورہ جات بھی کئے جائیں گے۔
