قراقرم یونیورسٹی اور ایس سی او کے درمیان آئی ٹی پارک کے قیام کا معاہدہ

گلگت (نیٹ نیوز) قراقرم انٹرنیشنل یونیورسٹی اور اسپیشل کمیونیکیشن آرگنائزیشن (ایس سی او) کے مابین آئی ٹی پارک اور ٹیکنالوجی انکیوبیشن سینٹر کے قیام کا معاہدہ ہو گیا۔ معاہدے کے مطابق دونوں ادارے مل کر قراقرم یونیورسٹی میں آئی ٹی پاک اور ٹیکنالوجی انکیوبیشن سینٹر قائم کرنے سمیت مشترکہ طور پر انفارمیشن ٹیکنالوجی کے فروغ کے مختلف منصوبوں پر کام کرینگے۔ مفاہمتی یاداشت پر قراقرم یونیورسٹی کی جانب سے رجسٹرار ڈاکٹر عبد الحمید لون جبکہ ایس سی او کی جانب سے کمانڈنگ آفیسر 63 کمپوزٹ سگنل بٹالین گلگت کے لیفٹیننٹ کرنل طارق درانی نے دستخط کئے۔ دستخط کے موقع پر ایس سی او کے ڈائریکٹر جنرل میجر جنرل علی فرحان، قراقرم یونیورسٹی کے وائس چانسلر پروفیسر ڈاکٹر عطاء اللہ شاہ، سیکٹر کمانڈر ایس سی او کرنل ثاقب اقبال سمیت قراقرم یونیورسٹی کے سینئر منیجمنٹ و فیکلٹی ممبران اور ایس سی او کے سینئر آفیسران بھی موجود تھے۔ اس ضمن میں یہ طے پایا کہ بہت جلد ایس سی او قراقرم یونیورسٹی کے ساتھ مل کر گلگت بلتستان کی تاریخ میں اہمیت کے حامل پہلا آئی ٹی پارک اور ٹیکنالوجی انکیوبیشن سینٹر کا قیام عمل میں لائے گی جس کے بعد گلگت بلتستان کے طلبہ و طالبات سمیت آئی ٹی شعبہ سے وابستہ افراد کو انفارمیشن ٹیکنالوجی سمیت آئی ٹی کے دیگر شعبوں میں کام کرنے کے لیے مزید آسانیاں مہیا ہو جائینگی۔