یمنی فوج نے امریکا کے بعد برطانوی جہازوں کو بھی نشانہ بنادیا

صنعا: یمنی فوج نے بحیرہ احمر میں برطانیہ کے دو جہازوں کو نشانہ بنادیا۔ یمن کی مسلح افواج کے ترجمان بریگیڈیئر جنرل یحییٰ سریع نے بتایا کہ مسلح افواج کے میزائل یونٹ نے بحیرہ احمر میں برطانوی ڈسٹرائر ڈائمنڈ کو متعدد بیلسٹک میزائلوں سے نشانہ بنایا۔ جبکہ یمنی بحریہ اور فضائیہ نے دو کارروائیوں میں غاصب صیہونی حکومت سے تعلق رکھنے والے نورڈرنی اور ایم ایس سی طویشی جہازوں کو نشانہ بنانے کے لیے بیلسٹک میزائلوں اور ڈرونز کا استعمال کیا جس سے پہلے والے جہاز میں آگ لگ گئی اور پھر دوسرے جہاز کو بھی براہ راست نشانہ بنایا گیا۔ یمن کی مسلح افواج کے ترجمان نے مزید کہا کہ نشانہ بنائے گئے بحری جہازوں نے مقبوضہ علاقوں کی بندرگاہوں کی طرف نقل و حرکت پر پابندی کے حکم کی خلاف ورزی کی اور اسی وجہ سے انہیں یمنی مسلح افواج نے نشانہ بنایا۔