لبنان پر اسرائیلی حملے کے بعد 8 لاکھ سے زائد افراد بے گھر

نیویارک : اقوام متحدہ نے کہا ہےکہ لبنان پر اسرائیلی حملے کے بعد آٹھ لاکھ سے زائد افراد بے گھر ہوچکے ہیں۔ اقوام متحدہ کے دفتر برائے انسانی ہمدردی کے مطابق لبنان میں 830,000 سے زیادہ افراد اپنا گھر بار چھوڑنے پر مجبور ہوئے ہیں. رجسٹرڈ افراد میں سے 52 فیصد خواتین ہیں۔ 189,298 بے گھر افراد 1,100 پناہ گاہوں میں مقیم ہیں۔ ان پناہ گاہوں میں سے 935 پناہ گاہیں یعنی 84 فیصد پناہ گاہوں میں مزید افراد کی گنجائش ختم ہوگئی ہے۔
ادھر اسرائیلی فوج نے جنوبی لبنان کے مزید دس دیہات کے مکینوں سے علاقے فوری طور پر خالی کرنے کو کہا ہے۔ ان مقامات میں صور کے علاقے میں واقع رشیدیہ فلسطینی پناہ گزین کیمپ بھی شامل ہے۔ اسرائیلی فوج نے کہا ہے کہ اس کیمپ کو حزب اللہ کی سرگرمیوں کی وجہ سے نشانہ بنانے کی تیاری کی جا رہی ہے۔ اسرائیلی فوج نے الحوش، البازوریہ، الرشیدیہ کیمپ، البرغلیہ کے شہریوں کو دریائے الاولی کی طرف جانے کو کہا گیا ہے۔