Raza Musani 
واشنگٹن :امریکا اور معتدل عرب ریاستوں کی حمایت یافتہ سیکیورٹی فورس غزہ کا کنٹرول سنبھالے گی۔ امریکی اخبار کے مطابق اسرائیل اور حماس کے درمیان مذاکرات کے حوالے سے امریکی حکام کی جانب سے ممکنہ جنگ بندی معاہدے کے نکات سامنے آ گئے۔ امریکی اخبار کا کہنا ہے کہ فورس کے ارکان کا چناؤ ڈھائی ہزار افراد کے پول سے ہو گا، فلسطینی اتھارٹی سے لیے گئے ان ڈھائی ہزار افراد کی اسرائیل سیکیورٹی کلیئرنس دے گا۔ مذاکرات کے امریکی نکات کے مطابق جنگ بندی کے پہلے مرحلے میں حماس 35 اسرائیلی قیدی رہا کرے گی، قیدیوں کی رہائی کے جواب میں اسرائیل سینکڑوں فلسطینیوں کو رہا کرے گا۔ امریکی اخبار نے کہا ہے کہ حماس پہلے مرحلے میں اسرائیلی خواتین اور 50 سال سے بڑی عمر کے یرغمالی رہا کرے گی۔ امریکی اخبار میں شائع نکات میں کہا گیا ہے کہ غزہ کا معاملہ طے ہونے پر لبنان میں بھی اقدامات ہوں گے، لبنانی حکومت حزب اللّٰہ کو اسرائیلی سرحد سے دور لے جائے گی۔
