ایک ماہ میں 70 فوجیوں کی ہلاکتیں، اسرائیل لبنان سے پسپائی پر مجبور، جنگ بندی کی کوشش

تل ابیب : ایک ماہ میں ستر سے زائد فوجیوں کی ہلاکتوں پر اسرائیل میدان جنگ سے بھاگنے پر مجبورہوگیا۔ حزب اللہ سے جنگ بندی کیلئے مسودہ تیار کرلیا۔ مسودے میں اسرائیل اور لبنان سے اقوام متحدہ کی قراردادوں پر عمل درآمد کا مطالبہ کیا گیا ہے۔ اسرائیل جنگ بندی کے سات دن کے اندر لبنان سے اپنی افواج واپس بلالے گا اور لبنانی افواج کی تعیناتی شروع ہوجائے گی۔ حزب اللّٰہ کو دریائے لطانی سے دور دھکیلنے سے بھی دستبردار ہوگیا۔ اسرائیلی میڈیا کے مطابق 7 روزہ جنگ بندی کے دوران مکمل عمل درآمد کو حتمی شکل دی جائے گی۔
لبنانی وزیراعظم نجیب میقاتی نے کہا ہے کہ امریکا کی جنگ بندی کی تجاویز پر آئندہ چند گھنٹوں یا دنوں میں عملدرآمد ہوسکتا ہے۔ لبنان اقوام متحدہ کی قراردادوں پر عملدرآمد کیلئے تیارہے۔ وائٹ ہاؤس کا کہنا ہے کہ اسرائیل لبنان جنگ بندی سے متعلق رپورٹس اور مسودے زیر گردش ہیں مگر یہ مذاکرات کی عکاسی نہیں کرتے۔ امریکی محکمہ خارجہ کے ترجمان میتھیو ملر نے کہا ہے کہ ایموس ہوکسٹین اسرائیل اور لبنان میں جنگ بندی کی تجاویز پر بات کریں گے .