رویت ہلال کمیٹی کے شیعہ ارکان نے علیحدہ کمیٹی بنالی

مفتی منیب کو ہٹانے تک کمیٹی کے اجلاس کا بائیکاٹ جاری رہے گا
لاہور(نیوز ڈیسک) متنازعہ مفتی منیب کی سربراہی کے خلاف رویت ہلال کمیٹی کا بائیکاٹ کرتے ہوئے شیعہ اراکین نے علیحدہ رویت ہلال کمیٹی بنالی، ربیع الاول کا چاند دیکھنے کیلئے مرکزی اور صوبائی رویت ہلال کمیٹیوں کے شیعہ ارکان کا ویڈیو لنک اجلاس ادارہ منہاج الحسین ؑ لاہومیں ہوا جس میں علامہ محمد حسین اکبر لاہور ، علامہ سید افتخار حسین نقوی اسلام آباد، علامہ محمد جمعہ اسدی کوئٹہ ، علامہ سید ارشاد حسین نقوی میرپور خاص ،علامہ محمد افضل حیدری لاہور ، علامہ سید فخر الحسن کراروی پشاور اور علامہ علی کرار نقوی کراچی سے شریک ہوئے ۔اجلاس میں ربیع الاول کا چاند نظر نہ آنے کا اعلان کیا گیا ،اور اتفاق کیا کہ کسی غیر متنازعہ شخصیت کو رویت ہلال کمیٹی کا چیئرمین بنانے تک اجلاسوں کا بائیکاٹ جاری رہے گا، صدر ، وزیر اعظم اور وفاقی وزیر مذہبی امور سے مطالبہ کیا گیا کہ شیعہ سنی تمام مکاتب فکر کے علما اور قومی اسمبلی کے معزز ممبران کے متفقہ مطالبہ کو پورا کرتے ہوئے 18 سال سے رویت ہلال کمیٹی پر قابض چیئرمین کو ہٹا کر نیا چیئرمین نامزد کیا جائے، جب تک ہمارا یہ مطالبہ منظور نہیں کر لیا جاتا ہمارا بائیکاٹ جاری رہے گا