خیبر پختونخوا اسمبلی نے 4 ستمبر یوم حجاب کے طور پر منانے کی قرار داد کثرت رائے سے منظور کر لی۔ خیبر پختونخوا اسمبلی میں جماعت اسلامی کی خاتون رکن حمیرا خاتون نے قرار داد پیش کرتے ہوئے مطالبہ کیا کہ 4 ستمبر کو یوم حجاب کے طور پر منایا جائے، قرار داد کی منظوری کے وقت اے این پی نے مخالفت کی۔ اے این پی کے پارلیمانی لیڈر سردار حسین بابک نے کہا کہ اسلام کو سیاست کیلئے استعمال نہ کیا جائے، ماضی میں بھی اسلام کے نام ہر دہشت گردی ہوئی، لوگوں میں برداشت ختم ہوئی طالبان نے لوگوں کو کوڑے مارے، ایسی قرار داد پیش کرنے سے قبل ایوان میں بحث ہونی چاہیئے۔ پیپلز پارٹی کی نگہت اورکزئی نے کہا کہ ہم چادر اور دوپٹے کی حمایت کرتے ہیں۔ وزیر قانون سلطان خان نے کہا کہ یوم حجاب منانے کی قرار داد کی حمایت کی جاتی ہے اور اگر کوئی یوم حجاب منانا چاہتا ہے تو اس میں کیا قباحت ہے، بحث کے بعد قرار داد منظور کیلئے پیش کی گئی۔ اے این پی کی مخالفت کے باوجود قرار داد کثرت رائے سے منظور کر لی گئی۔
