امریکا ایران پر اسرائیلی حملے کا مکمل ذمہ دار ہے، حزب اللہ

بیروت : حزب اللہ نے ایران پر صیہونی حملے کی شدید مذمت کرتے ہوئے جارحیت کا مقابلہ کرنے میں ایرانی مسلح افواج کی کامیاب کارکردگی کو سراہا ہے۔ حزب اللہ نے ایک بیان میں کہا کہ اسرائیلی جارحیت پورے خطے میں کشیدگی میں اضافے کا خطرناک اقدام ہے۔ یہ حملہ قابض رجیم کی بوکھلاہٹ کو ظاہر کرتا ہے، ایک ایسی رجیم جو امریکہ کی مکمل حمایت سے وحشیانہ جرائم کا ارتکاب کرتی ہے۔ لہذا امریکہ اس حکومت کے جرائم کے ساتھ شریک اور مکمل طور پر ذمہ دار ہے۔ بیان میں مزید کہا گیا ہے کہ ہمارا یقین ہے کہ اسلامی جمہوریہ ایران کی قومی خودمختاری پر اس کھلی جارحیت سے ایران کا فلسطین اور لبنان کی حمایت پر مبنی موقف کسی صورت متاثر نہیں ہو گا۔ حزب اللہ نے کہا کہ ہم اس بزدلانہ حملے سے کامیابی کے ساتھ نمٹنے میں ایرانی مسلح افواج کی کامیابی کو سراہتے ہیں اور راہ قدس پر ایرانیوں کی شہادت پر اسلامی جمہوریہ ایران کی قیادت اور معزز قوم کو تعزیت پیش کرتے ہیں اور اللہ تعالی سے دعا ہے کہ وہ زخمیوں کو جلد صحت یابی جب کہ اسلامی جمہوریہ ایران کو فتح و استحکام عطا فرمائے۔