شہر قائد میں شدید بارشوں کا سلسلہ جاری ہے، بارش نے کئی علاقوں کو ڈبو دیا، اتوار کو ہونے والی بارش کے بعد بدترین صورتحال مزید ابتر ہوگئی ہے۔ تفصیلات کے مطابق آج بروز پیر تقریباً ساڑھے بارہ بجے ضلع وسطی کے کئی علاقوں میں شروع ہونے والی بارش کا سلسلہ دوپہر تین بجے تک جاری رہا، اس دوران گلبرگ، عائشہ منزل، نارتھ ناظم آباد، بفرزون، بورڈ آفس سمیت اطراف کے علاقوں ميں بارش ہوئی۔ کے ڈی اے چورنگی پر ٹريفک معطل ہونے سے درجنوں گاڑياں رک گئيں۔
سخی حسن، گلشن اقبال اور گلستان جوہر میں بھی تیز بارش سے صورتحال خراب ہوگئی۔ اورنگی ٹاؤن، بلدیہ، پاور ہاؤس چورنگی اور سرجانی میں بارش سے شہریوں کے معمول بری طرح متاثر ہوئے۔ شارع فیصل ایف ٹی سی کے قریب ٹریفک کی روانی بارش کا پانی جمع ہونے سے متاثر ہوئی۔ ریسکیو حکام نے بتایا ہے کہ بلديہ ٹاؤن میں کرنٹ لگنے سے 2 افراد جاں بحق ہوگئے۔ دونوں افراد کو پانی کی موٹر سے کرنٹ لگا۔ جبکہ شہر کے نشیبی علاقوں میں کئی کئی فٹ پانی کھڑا ہے۔
