ملتان قرنطینہ: صحت مند زائرین تاحال گھر جانے کے منتظر

حکومتی یقین دہانیوں کے باوجو د زائرین کو تنگ کیا جارہا ہے، شیعہ علماء کونسل
لاہور (پ ر) شیعہ علماء کونسل پاکستان کے مرکزی سیکریٹری جنرل علامہ عارف حسین واحدی نے کہا ہے کہ زائرین کو تفتان کے بعد ملتان سمیت دیگر قرنطینہ سینٹرز میں رکھا گیا حالانکہ ابتدائی طور پر بنیادی سہولیات تک نہیں تھیں، مشکل صورتحال کے پیش نظر وفاقی و صوبائی حکومتوں کے ساتھ نچلی سطح تک مکمل تعاون کر تے رہے ہیں مگر اس کے باوجود طبی، حفاظتی اقدامات اور قرنطینہ کی دوہری مدت پوری کرنے کے باوجود زائرین کو ان کے گھروں میں جانے سے روکا جارہا ہے، زائرین کے ساتھ اس طرح کا ناروا سلوک اور میڈیا ٹرائل ناقابل قبول ہے، ایسی صورت حال برقرار رہی اور تحفظات دور نہ کئے گئے تو ذمہ دار انتظامیہ اور حکومت خود ہوگی،ان خیالات کا اظہار انہوں نے صو بائی صدر علامہ سید سبطین حیدر سبزواری سے زائرین سے متعلق حالیہ صورتحال پرگفتگوکرتے ہوئے کیا،انہوں نے کہا کہ سینکڑوں زائرین صحت مند قرار دیئے جانے کے باوجود گھروں کو روانہ نہ کئے جاسکے۔