Raza Musani 
غزہ : حماس اور جہاد اسلامی نے اسرائیل میں متحدہ عرب امارات کے سفارت خانے کے افتتاح کی شدید الفاظ میں مذمت کرتے ہوئے اسے فلسطینی قوم اور خطے میں آباد قوموں کے حق میں سب سے بڑا ظلم قرار دیا ہے، حماس نے ایک بیان میں کہا کہ عرب امارات کے اس اقدام سے اسرائیل کو فلسطینیوں کے خلاف ظلم اور مقدس مقامات کی توہین کا سلسلہ جاری رکھنے کی مزید ترغیب ملے گی، زیادہ وقت نہیں گزرے گا کہ صیہونی دشمن کے ساتھ تعلقات قائم کرنے والے ملکوں کو فلسطینی قوم اور علاقے کی دیگر اقوام کے خلاف اپنے اس مجرمانہ اقدام کے خطرناک نتائج کا سامنا کرنا پڑے گا، جہاد اسلامی کے ترجمان طارق سلمی نے کہا کہ تاریخ اس بات کو ہمیشہ یاد رکھے گی کہ ابوظہبی کے حکام نے ایسے وقت میں مقبوضہ فلسطین میں سفارتخانہ قائم کیا ہے جب اسرائیل نے القدس شریف اور مسجد الاقصی کے خلاف مجرمانہ اقدامات اور فلسطینیوں کے گھروں کے انہدام کا سلسلہ تیز کردیا ہے، ہوسکتا ہے کہ متحدہ عرب امارات کا سفارت خانہ بھی 1948 میں بے گھر کئے گئے کسی فلسطینی کے تباہ شدہ مکان کے ملبے پر قائم ہوا ہو، اسرائل کے ساتھ سفارتی تعلقات کا قیام فلسطینی عوام اور اسلامی دنیا کے خلاف سب سے بڑی خیانت ہے۔
