والدین کی خدمات کا صلہ

”اور تیرے رب نے یہ فیصلہ کیا ہے کہ اس کے علاوہ کسی کی عبادت نہ کرو اور والدین سے بھلائی کرو۔“ (القرآن )
والدین کا خدمت گزار
 ہم نشین انبیائ
حضرت موسیٰ ؑ نے ایک مرتبہ اللہ تعالیٰ سے درخواست کی کہ مجھے میرے جنت کے ساتھی کی زیارت کرائی جائے۔ تاکہ میں اسے دیکھ سکوں کہ وہ کیسا انسان ہے۔
جناب جبرئیل ؑ امین نازل ہوئے۔ اور کہا کہ موسیٰ ؑ ! فلاں قصاب (گوشت فروش ) جو فلاں محلہ میں رہتا ہے وہ جنت میں آپؑ کا ہم نشین ہوگا۔
حضرت موسیٰ ؑ اس سے ملنے کے لئے اس کی دکان پر گئے۔ اور دیکھا وہ دوسرے قصابوں کی طرح گوشت فروخت کرنے میں مصروف تھا۔
عصر کے وقت وہ جوان فارغ ہوا۔ اور اپنے حصے کا گوشت اٹھاکر اپنے گھر کی طرف چل پڑا حضرت موسیٰ ؑ اس کے پیچھے پیچھے اس کے دروازے پر آئے اور اسے کہا کہ میں آج تمہارا مہمان ہوں۔ جوان نے خو ش آمدید کہا۔ وہ آپ ؑ کو ساتھ لے کر اندر گیا۔ اس نے پہلے تو کھانا تیار کیا بعد ازاں گھر کی دوسری منزل پر گیا جہاں سے وہ ایک بڑی زنبیل (کھجور کے پتوں سے بنی ہوئی ٹوکری) کو اٹھا کر لایا۔
جناب موسیٰ ؑ نے دیکھا کہ اس زنبیل میں ایک بوڑھی عورت تھی۔ جو ان نے اس عورت کو زنبیل سے نکالا۔ اسے اپنے ہاتھوں سے نہلایا، بعد ازاں اپنے ہاتھوں سے اس بڑھیا کو کھانا کھلایا پھر اس نے بڑھیا کو زنبیل میں لٹا یا اور اسے سابقہ مقام پر رکھنے کے لئے اٹھا تو اس عورت نے کچھ کلمات ادا کئے جو کہ پیرانہ سالی (بڑھاپے) کے باعث قابل فہم نہ تھے۔
بعدازاں جوان موسیٰ ؑ کے لئے طعام لایا۔ حضرت موسیٰ ؑ نے جوان سے پوچھا کہ اس عورت سے تمہارا کیا تعلق ہے؟
جوان نے بتایا کہ یہ میری بوڑھی ماں ہے اور میں مالی طور پر کمزور ہوں اس کی خدمت کے لئے نوکرانی کا انتظام نہیں کر سکتا۔ اسی لئے میں خود ہی اس کی خدمت کرتا ہوں۔
حضرت موسیٰ ؑ نے پوچھا کہ تمہاری ماں کھانا کھانے کے بعد کیا کہہ رہی تھی؟
جوان نے جواب دیا کہ میری ماں کا اصول ہے جب بھی میں اسے نہلاتا اور کھانا کھلاتا ہوں تو وہ ہمیشہ دعا دے کر کہتی ہے۔
” خدا تیری مغفرت فرمائے اور روز قیامت تجھے موسیٰ ؑ کا ہم نشین بنائے، تجھے اسی جنت اور اسی درجہ میں جگہ دے جہاں موسیٰ ؑ ہوں۔“
حضرت موسیٰ ؑ نے فرمایا۔
” جوان تجھے خوشخبری دیتا ہوں اللہ تعالیٰ نے تیری ماں کی دعا کو قبول کرلیا ہے۔ مجھے جبرئیل ؑ نے یہ خبر سنائی ہے کہ تو جنت میں میرا ہم نشین ہوگا۔“