متنازع بل پر شیعوں کے تحفظات دور کریں گے،اسپیکر

شیعہ علما کونسل کے وفد سے ملاقات میں پرویز الہیٰ کی وضاحتیں
لاہور (نیوز ڈیسک) اسپیکر چودھری پرویزالہیٰ نے ایک بار پھرشیعہ علما کونسل کویقین دلایا کہ تحفظ بنیاد اسلام بل پر شیعوں کے تحفظات دور کئے جائیں گے، علامہ عارف واحدی کی زیر قیادت شیعہ علما کونسل کے وفد سے ملاقا ت میں پرویز الہی نے کہا کہ اہلبیت(ع) سے محبت ہمارے ایمان کا حصہ ہے، اہلبیت اطہار کے لئے علیہ السلام یا سلام اللہ علیہ لکھا جائے گا، مکاتب فکر کے علما سے مشاورت کر رہے ہیں اور جلد ہی بل کو حتمی شکل دے کر گورنر پنجاب کی منظوری لی جائے گی، علامہ عارف واحدی نے بل کے حوالے سے تحفظات سے آگاہ کیا اور کہا کہ یہ تحفظات دور کئے بغیر بل کو پاس نہ کیا جائے،پرویز الہی نے اس سے پہلے جماعت اہلحدیث کے وفد سے ملاقات میں یقین دلایا تھا کہ بل میں سوائے علیہ السلام لکھنے کے اور کوئی تبدیلی نہیں کی جائے گی اور اسے موجودہ حالت میں ہی منظور کیا جائے گا