سینچری ڈیل مقاومتی گروہوں کے ایک دوسرے سے مزید قریب ہونے کا باعث ہے، حماس

فلسطین کی اسلامی مزاحمتی تحریک حماس کے رہنما نے امریکی و صہیونی منصوبے سینچری ڈیل کو فلسطینیوں کی مقاومت و مزاحمت اور فلسطینی گروہوں کے ایک دوسرے سے مزید قریب ہونے کا باعث قرار دیا۔ فلسطین کی اسلامی مزاحمتی تحریک حماس کے رہنما حسام بدران نے اس جانب اشارہ کرتے ہوئے کہ فلسطینیوں کو ایک پلیٹ فارم پر جمع ہو کر جدوجہد کرنی چاہئے، کہا کہ فتح و حماس کے وفود کے مابین ترکی میں ہونے والی ملاقات مثبت رہی۔
حماس کے رہنما کا کہنا تھا کہ فتح و حماس کے مابین وسیع سمجھوتہ طے پا گیا ہے جس سے فلسطین کے دیگر گروہوں کوآگاہ کیا جائے گا۔
واضح رہے کہ فلسطینی گروہ فتح اور حماس کے وفود کے مابین منگل کے روز سے ترکی کے شہر استنبول میں صلح و آشتی سے متعلق مذاکرات شروع ہوئے۔
یاد رہے کہ امریکی صدر ٹرمپ نے 28 جنوری 2020 کو سینچری ڈیل منصوبے کی رونمائی کی جس میں غرب الاردن کے بعض علاقوں کو مقبوضہ علاقوں میں شامل کیا جانا بھی شامل ہے۔
صہیونی حکومت کے وزیر اعظم بنیامین نتن یاہو نے غرب الاردن کے 30 فیصد علاقوں کو مقبوضہ علاقوں میں شامل کرنے کے منصوبے پر یکم جولائی سے عمل کرنے کا اعلان کیا تھا تاہم تمام فلسطینیوں کی جانب سے اور علاقائی و عالمی سطح پر کی جانے والی مخالفتوں کے بعد وہ اپنے اس منصوبے کو ملتوی کرنے پر مجبور ہو گئے۔ تاہم اس کے بعد امریکی صدر ٹرمپ نے اسرائیل کے ساتھ عرب ممالک کے تعلقات کی برقراری کا بیڑا اٹھایا ہے۔