افغانستان میں بحران، دو متوازی حکومتیں قائم ہوگئیں

اشرف غنی کے ساتھ ساتھ عبداللہ عبداللہ نے بھی صدارت کا حلف اٹھالیا
کابل (نیوز ڈیسک) افغانستان کے صدر اشرف غنی نے دوسری مدت کے لیے عہدے کا حلف اٹھا لیا تاہم ان کے حریف سیاستدان اور چیف ایگزیکٹو عبداللہ عبداللہ نے متوازی حکومت بنانے کا اعلان کرتے ہوئے خود بھی ایک تقریب منعقد کرکے ‘صدارت’ کا حلف اٹھا لیا، اشرف غنی کی تقریب حلف برداری افغانستان کے دارالحکومت کابل کے صدارتی محل میں ہوئی، تقریب میں امریکی نمائندہ خصوصی برائے افغان امن عمل زلمے خلیل زاد، امریکی ناظم الامور روس ولسن، امریکی و نیٹو فورسز کے کمانڈر جنرل اسکاٹ ملر، یورپی یونین، کینیڈا، آسٹریلیا، ڈنمارک، جرمنی اور ناروے کے سفرا بھی موجود تھے، تقریب کے دوران کابل میں دھماکوں کی آوازیں بھی سنی گئیں دوسری جانب اشرف غنی کے حریف اور سابق چیف ایگزیکٹو عبداللہ عبداللہ نے الگ سے رہائشی سپیدار محل میں ایک تقریب منعقد کرکے صدر کی حیثیت سے حلف اٹھا لیا جس کے بعد صدارتی عہدے کا معاملہ گھمبیر ہو گیا ہے۔