افغانستان میں امن،، جامع سیاسی مذاکرات میں ہے،پاکستان

خطے میں امن و استحکام کے لیے پاکستان مصالحانہ کوششیں کرتا رہے گا
دوشنبے(نیوز ڈیسک )پاکستان اور ترکی نے نویں ہارٹ آف ایشیا۔ استنبول پراسس کانفرنس کے انعقاد کو افغانستان میں قیام امن کے لیے خوش آئند قرار دیا ہے، وزیر خارجہ مخدوم شاہ محمود قریشی نے کہا ہے کہ پاکستان سمجھتا ہے کہ افغان مسئلے کا دیرپا اور مستقل حل افغان قیادت کے درمیان جامع سیاسی مذاکرات میں مضمر ہے،شاہ محمود قریشی نے کہا کہ پاکستان اور ترکی کے مابین یکساں مذہبی، تہذیبی اور ثقافتی اقدار کی بنیاد پر گہرے برادرانہ تعلقات استوار ہیں جبکہ دونوں ممالک کے درمیان اعلیٰ سطح کی اسٹریٹیجک تعاون کونسل کے قیام نے دونوں ممالک کے تعلقات کو اسٹرٹیجک شراکت داری میں تبدیل کر دیا ہے ، پاکستان، افغان امن عمل سمیت خطے میں امن و استحکام کے لیے اپنی مصالحانہ کوششیں بروئے کار لاتا رہے گا۔