صیہونی عدالت نے شیخ جراح کے فلسطینی خاندانوں کو کرایہ دار ظاہر کردیا

مقبوضہ بیت المقدس : صیہونی سپریم کورٹ نے مقبوضہ مشرقی بیت المقدس کے علاقے شیخ جراح سے 4 فلسطینی خاندانوں کی بے دخلی پر پابندی عائد کردی تاہم فلسطینیوں کو کرایہ دار ظاہر کرکے کرایہ ادا کرنے کا حکم دیدیا۔ 3 ججوں کے پینل کے فیصلے میں لکھا ہے کہ خاندانوں کو محفوظ کرایہ دار تسلیم کیا جائے گا اور زمین کے حقوق کے تعین تک یہودی آباد کار گروپ کو 2 ہزار 400 شیکل (تقریباً 740 امریکی ڈالر) علامتی سالانہ کرایہ ادا کریں گے۔ شیخ جراح میں یہ چار خاندان ان جھڑپوں کا مرکز تھے جس نے گزشتہ سال مئی میں اسرائیل اور حماس کے درمیان 11 روزہ جنگ کو ہوا دی تھی ۔ شیخ جراح مقبوضہ بیت المقدس پر اسرائیلی قبضے کے خلاف فلسطینی مزاحمت کی علامت بن چکا ہے۔