صیہونی درندگی، مزید 40 فلسطینی شہید

غزہ : غزہ میں صیہونی درندگی جاری ہے، چوبیس گھنٹوں کے دوران مزید چالیس فلسطینی شہید کردئے۔ صیہونی فوج نے دیرالبلاح میں مکان کو نشانہ بنایا۔ حملے میں خاندان کے تین افراد شہید ہوگئے۔ غزہ سٹی پر حملے میں آٹھ افراد مارے گئے۔ وسطیٰ غزہ میں بھی آٹھ افراد شہید ہوئے۔ جہاں چھ دن سے فوجی آپریشن جاری تھا۔ صیہونی فوج بڑے پیمانے پر تباہی مچا کر علاقے سے نکل گئی ادھر مزاحمت کاروں سے جھڑپوں میں چار فوجی ہلاک اور سات زخمی ہوگئے۔ اسرائیلی حملوں میں شہید افراد کی تعداد 37 ہزار دو سو سے تجاوز کرگئی ہے۔ کئی دنوں کے بعد غزہ میں امدادی سامان داخل نہیں ہوسکا۔ اس وقت بھی دو ہزار ٹرک غزہ میں داخل ہونے کیلئے مصر کی سرحد پر موجود ہیں۔ اقوام متحدہ کے سیکریٹری جنرل انتونیو گوتریس نے صورتحال کو انتہائی افسوسناک قرار دیا ہے۔