مغربی کنارے اور غزہ میں صیہونی حملے، 48 فلسطینی شہید

غزہ : صیہونی فوج نے فلسطینیوں کے خلاف جارحیت کو مغربی کنارے تک توسیع دیدی۔ دو حملوں میں آٹھ فلسطینی جان سے گئے۔ فلسطینی ہلال احمر کے مطابق طوباس کے شمال میں واقع قصبے عقبہ میں اسرائیلی فوج سے تصادم میں چار فلسطینی مارے گئے جبکہ آٹھ زخمی ہوئے، جن میں دو کی حالت نازک ہے۔ یہ تصادم اسرائیلی فوج کے چھاپے کے بعد شروع ہوا۔
ادھر جنین میں بھی ایک حملے میں چار فلسطینی نشانہ بنے۔ ادھر خان یونس میں اسرائیلی فوج نے پناہ گزینوں کے کیمپوں پر وحشیانہ گولہ باری کردی۔ درندگی کے تازہ مظاہرے میں پندرہ معصوم اور نہتے شہری شہید اور زخمی ہوگئے۔فلسطینی وزارت صحت کے مطابق شہدا میں زیادہ تعداد عورتوں اور بچوں کی ہے۔ البریج سے بھی چھ لاشیں ملی ہیں۔ المواصی میں صیہونی حملے میں آٹھ بچوں سمیت دس معصوم اور نہتے شہری شہید ہوئے ہیں۔اسرائیلی حکام نے نوے لاشیں بھی فلسطینی حکام کے حوالے کی ہیں جن کی شناخت نہ ہوسکی۔لاشوں میں زیادہ تعداد بچوں کی ہیں۔