رفح، خان یونس اور شجاعیہ میں صیہونی حملے، متعدد فلسطینی شہید وزخمی

غزہ : صیہونی فوج نے جنوبی غزہ کے مختلف علاقوں پر رات بھر حملے کئے جس میں درجنوں افراد شہید و زخمی ہوگئے۔ صیہونی فوج نے رفح۔ خان یونس اور شجاعیہ میں میزائل داغے اور توپ خانے سے شدید گولہ باری کی۔ حملوں میں مکانات اور رہائشی مقامات کو نشانہ بنایا گیا۔ وحشیانہ حملوں میں درجنوں افراد شہید و زخمی ہوگئے۔ شجاعیہ میں زمینی کارروائی کے دوران صیہونی فوج کو شدید مزاحمت کا سامنا ہے۔ مزاحمت کاروں کی جوابی کارروائی میں صیہونی فوج کو بھاری نقصان پہنچا ہے۔ حماس کے عسکری ونگ القسام بریگیڈ نے کہا ہے کہ وہ صیہونی فوجیوں پر گھات لگاکر اور انہیں پھنسا کر مختلف دھماکہ خیز آلات اور ٹینک شکن میزائلوں سے حملے کر رہے ہیں۔ صیہونی فوج نے دو اہلکاروں کی ہلاکت اور دو کے زخمی ہونے کی تصدیق کی ہے۔
سات اکتوبر کے بعد صیہونی فوج کی زمینی کارروائی میں ہلاک فوجیوں کی تعداد 318 ہو گئی۔ اُدھر اقوام متحدہ کے ادارے اونروا نے کہاہے کہ غزہ میں پانچ لاکھ سے زیادہ افراد تباہ کن بھوک کا سامنا کر رہے ہیں۔ امدادی کی فراہمی نہ ہوئی تو محصور علاقہ شدید ترین قحط سے دوچار ہوجائے گا۔